Dim ond pythefnos yn ôl 'roeddwn yn blogio am broblemau trychinebus y Rhyddfrydwyr a hwythau wedi toddi i fewn i glymblaid gyda'r Toriaid yn Llundain. Soniais a hefyd am ystrywiau Llafur yn chwarae bod yn wrthblaid. (Fe gofiwch i Lafur wrthod cefnogi cynnig seneddol Plaid Cymru i ddileu penderfyniad cywilyddus y ConDems i godi Treth ar Werth).
Roedd y Rhyddfrydwyr yn amlwg yn dioddef yn etholiadol - o bôl piniwn ICM. A dyma ni bellach yn cael cadarnhad ym mhôl Cymru gyfan gan ITV.
Mae'r pôl yma yn holi yn benodol am fwriadau pleidleisio pobl Cymru yn etholiad y Cynulliad y flwyddyn nesaf.
O ran y bleidlais rhestr, mae'n cadarnhau yr hyn roeddwn yn ei ddweud gyda'r Rhyddfrydwyr bellach lawr at hanner lefel eu cefnogaeth ym mis Mai (20% i 10%). Felly mae'n bosibl y bydd yr etholiad nesaf yn rhoi'r ergyd farwol gwbl haediannol iddynt, ac y gwelwn ddiflaniad y giwed diwerth yma fel nerth gwleidyddol cenedlaethol. Dyna fyddai'r ateb gorau i frolio gwag Kirsty Williams ei bod am ennill 31 sedd yn yr etholiad nesaf.
Yn ail, mae chwarae bod yn wrthblaid yn Llundain wedi rhoi hwb dros dro i bleidlais Llafur yng Nghymru. Y nhw cofiwch yw rhieni bedydd y glymblaid ConDem gan iddynt wrthod trafod clymblaid flaengar gyda'r Blaid a'r SNP. Annodd darogan a fydd y fantais yma yn parhau wrth i’r ras arweinyddol droi Llafur fwy-fwy o gwmpas gwrthod neu dderbyn gwaddol Blair (gweler y ddolen isod). Ond y mae'n annodd gen i weld Llafur dan yr un o'r Millbands yn wrthblaid effeithiol, a phrin y byddent yn sefyll dros fuddiannau Cymru a map Lloegr gyfforddus mor las …
'Un pol na wna etholiad ' fel mae nhw’n dweud! Yr hyn sydd yn ddiddorol am bôl ITV felly yw fod y gefnogaeth i Lafur a'r Rhyddfrydwyr fel eu gilydd ar y ffordd i lawr ers y mis diwethaf. Yn yr un modd mae pleidlais Plaid Cymru ar y rhestrau ac yn yr etholaethau fel ei gilydd wedi cynyddu i lefel uwch na chafwyd yn etholiad 2007 - ac mae ein pleidlais ni ar y blaen i'r Toriaid.
Momentwn yw popeth mewn gwleidyddiaeth a chyda gwrthwynebiad i bwerau pellach i'r Cynylliad yn meddalu a phosibiliad da o ennill y refferendwm ar bwerau pellach ym mis Mawrth,rydym fel Plaid mewn sefyllfa ffafriol iawn.
Nid dyma'r lle i sôn am brosesau dewis mewnol y Blaid. Ond rhad i mi ddweud fod gennym griw arbennig o dalentog o ddarpar ymgeiswyr ac mae'r cysylltiad agos tu hwnt sydd yn datblygu rhwng ymgeiswyr ac ymgyrchwyr y Blaid wedi creu potensial rhyfeddol o addawol prin naw mis o’r etholiad.
Dros yr wythnosau nesaf, bydd yr hystingiau ar gyfer rhestrau'r Cynulliad yn gyfle gwych i ymgeisyddion ac aelodau gydio yn y cyfle sydd o'n blaenau ni i sefyll dros fuddiannau Cymru nawr a dechre’r gwaith o adeiladu Cymru tecach a mwy ffyniannus yn y dyfodol. Byddwn yn ethol y grwp cryfaf, mwyaf talentog a mwyaf penderfynnol i Blaid Cymru ddanfon i'n Senedd ni erioed.
Amdani!
No comments:
Post a Comment